© All rights reserved 2011 -  2017      Djispi Productions      Web design by Cathleen Giterson

Djis un Pensamentu

Un E-magazine  pa inspirá, eduká, konsientisá i entretené

Bon Biní
Bienvenido
Welcome
Welkom Djispi

Konsientisá: Basha, Djispi, basha!

Pens’é!

Basha, Djispi, basha!

Nos tesoro

Paga tinu!

Bo pensamentu (?)

_____________________________________________________________________


Esaki ta espasio di nos konfidente Djispi. Djispi ta na palabra den e rúbrika akí i e lo bai bashá pensamentu pa tur su ‘pensamentistanan’, manera e ta yama nan. Ta trata di komentario skèrpi riba un òf mas tópiko relashoná ku kualke aktividat kalendario di e temporada di aña konserní.


Hei, kerido pensamentistanan, kon ta bai!

Ata Djispi akí kla pa basha bou, pone hopi pensamentu floresé!
Den e edishon akí Djispi ke kompartí lo siguiente ku boso:
Bailamentu..


Éen stap naar voren, twee terug. Éen stap naar voren, twee terug... Atá shonnan, kon ta bai. Nò, no spanta. No ta bèk Djisipi ta bèk a la kangreu no. Ta nèt boso a gara Djispi akí, ta train baila un baile nobo ku Djispi ta inventando. Den fin di siman ku ta tras di lomba ei Djispi tabata kòmbersando ku un amigu hulandes di Djispi, i ora el a papia kuenta di Éen stap naar voren, twee terug, el a inspirá Djispi pa krea un baile nobo. Djispi ta yama e  baile akí ‘de Morocoyen dans’. E ta bai ta e baile hit di aña 2017. Pero Djispi lo bini bèk riba esei un djis.


Ta masha hopi hende mes tin ta práktika e baile akí diariamente sin nan sa mes. Ai sí yu. Ki ora ku nan hasi òf logra algu nan ta dal dos stap patras bèk djis despues. Awèl, Djispi a kue hink’é den un baile. Djispi tin idea di pon’é tambe riba Djispi su facebook page i Djispi su youtube. Boso lo mira. Asina Djispi pon’é. Lo e ‘go viral’. Pió ku tur e tantísimo malesa ‘viral’ nan ei ku ta keda saka kabes afó a la morkoi ki ora ku bo ke. Pero Djispi lo bini bèk riba esei un djis.


Shonnan, nos no ta ni kaba di tende di Chikungunya, ku ata nos ku Zika. Nos no ta ni kaba di tende di Zika, ku ata nos ku un nobo . Sin ta esaki ta esaya. Kontinuamente. Ai, lag’é kansa hende hòmbu. Asina tantu kos ku ta keda pasa tras di otro ku bo no tin ni nodi di kibra kabes pa traha un tambú. E inspirashon mes ta kana bini sin bo tin ku bai busk’é. Tambúnan mes ta lanta pia for di tera sin bo tin mester di lantanan. Antó papiando di tambú… Pero Djispi lo bini bèk riba esei un djis.


Mi shonnan dushi, manera boso por a lesa kaba aya riba, e tópiko di e biaha akí ta bailamentu. Boso ta komprond’é awor ta dikon Djispi ta ‘drùk bezig’ ku e baile nobo ku Djispi a kaba di inventá akí? Ki boso a kere Djispi tambe ta sigui aktualidat. Nò, boso no ta kere? Awèl djis ‘follow’ Djspi i boso ta keda konvensí. Wak kon tuti Djispi a keda riba Djispi su Instagram pa boso konvensé boso mes ‘de una vez por todas’. Pero Djispi lo bini bèk riba esei un djis.


Wet’akí! Poko dia ei Djispi tabata ‘Snapchat’ ku un ‘fan’ di Djispi ei i el a konta mi yen di kos. Un otro ‘fan’ di Djispi (boso mes por komprondé ku un personahe manera Djispi akí ta hopi fanátiko e tin, no?) a manda un ‘tweet’ riba Djispi su ‘twitter page’ (boso mes ta komprond’é atrobe ku henter ‘social media’ akí ta brabu serka Djispi, no?) ku tabata puntra Djispi tokante ta kon mester baila sierto di nos bailenan. Pero Djispi lo bini bèk riba esei un djis.


Shonnan, ora Djispi a puntra tur Djispi su fanátikonan dikon ta tur ta puntra Djispi meskos, Djispi a bin komprond’é ku ta pasobra tabatin sierto kuestionnan ku tabata tuma lugá últimamente riba nos isla pa loke ta trata e manera korekto di baila nos bailenan. Pero Djispi lo bini bèk riba esei un djis.


Awèl, pa klara tur informashon, evitá tur spekulashon i tur konfushon i pa kaba ku tur destrukshon di nos bailenan, Djispi ta bai basha hasiendo uso di e baile nobo ku Djispi a inventá, ku ya boso a sera konosí kuné aya riba kaba titulá ‘de Morocoyen dans’. Pero Djispi lo bini bèk riba esei un djis.


Nos pueblo sa bonbon kon pa baila no solamente nos propio bailenan, sino asta bailenan di afó. I tin biaha mihó ku e propio nativonan mes di e pais di orígen di e bailá ei. Tur hende sa ku e término ‘bailadores’ ta nos yunanan di tera por karg’é ku honor. Paso ta aki tin kátedra di bailementu. No ta pa broma, pero manera Djispi ta kere hopi di boso mes ta na altura di dje kaba, Djispi mes ta bini di un famia largu di ‘bailadores’. Anto ya komo ku ta Djispi akí ta e ‘ùmpi dùmpi di famia pensamentu’, esei ta enserá ku Djispi tabatin e privilegio di karga un tiki di henter e don den bailamentu di e ‘stamboom’ di famia Pensamentu. Ku otro palabra, no tin un alma den e universo akí ku por marka paso mihó ku e grawatá di wea akí. Éen, twee, huppekee!!! Ta Djispi b’a tende. Pero Djispi lo bini bèk riba esei un djis.


Biniendo bèk, riba e tema, Djispi su pueblo sa bonbon kon pa baila nèchi i kon pa gosa. Lamentablemente tin tambe esnan ku no por laga di keda sin hasi un tiki di mas. Tin biaha un tiki, muchu, demasiado di mas. Pero shonnan, kòrda ku na bo kas dilanti di bo spil, bo por hasi kuantu di mas ku bo ke. Ora bo ta den otro ambientenan sí, ku no ta na bo kas, por fabor komportá bo na drechi. Ki ora ku bo ke marka paso, lanta huma i mustra tur hende loke bo tin aden, djis buska un spil i puntr’é: ‘Spiegeltje, spiegeltje aan de wand, ben ik thuis of elders in het land?’ Si e kontesta ta ‘elders in het land’, buska un kabe’i boto i bai bo kas bai baila dilanti di bo spil na kas. Ei na kas bo por baila, e ora ku bo ke, kuantu ku bo ke, i  mane bo ke! Pero Djispi lo bini bèk riba esei un djis.


Den konformidat di bo propio hogar, bo no tin nodi di duna niun hende kuenta i rason di na unda, kon òf ku ken bo a baila. Di e manera akí bo por sea dal kòpròl, hit the floor, hasi ‘spagaat’ (no traha spaguèti sí, no), i grita: ‘The roof, the roof, the roof is on fire …’, kuantu ku bo ke. Asin’akí bo no tin nodi di wòri ora kosnan bira kayente i brua den otro bira un tutu sin manteka, sin koko i sin keshi. At’é! E palabra mágiko a kai. Mara Djispi por haña un tayó aworakí mes, Djispi ta basha kareda bai, stòp di basha i kuminsá fretu na Djispi su ehehe. Mir’akí yu, suta Djispi ta suta e kos ei mand’abou. Pero Djispi lo bin bèk riba esei un djis.


Pensamentistanan ya komo ku Djispi a tende kuenta di tutu, Djispi su wowonan a kuminsá bira rònt den Djispi su kabes, Djispi su boka a kuminsá kore awa i ya Djispi no por PENSA nèt nèt nada mas.
Asina ta Djispi ta djis plantia e siguiente proposishon:

Pa evitá di tin ku baila Djispi su famoso ‘Morocoyen dans’, kaminda bo ta gosa un bòl sí, pero si bo ta avansá mashá sí, esei sí Djispi no por garantisá bo. Esei n’ ta kai bò’i Djispi. Asina ta, no bin kritiká Djispi despues, paso bo mes tabata sa bonbon ku ki bo ta ‘bezig’. Bo progreso lo ta manera e nòmber di e baile mes ta bisa: a la Morrocoy. Djispi ta bisa bo djis kòrda esaki: Si bo ke progresá, simplemente mobilisá! Pero Djispi lo bin bèk riba esei un djis.


Asina ta basha bo pensamentunan den e siguiente rúbrika. Awor ta turno pa ABO trese Bo pensamentu (?) dilanti tokante e tópiko di Bailamentu akí.


Tutu tutu turesten, kuida boso kurpa i te e siguiente okashon ku Dios su poder.


Duike, duike