Kontenido di e buki akí ta kompilashon di susesonan diario di e époka mas enérgiko di mi bida, den kua mi a funshoná komo sipir[1] den e prizòn ku tabata situá na Plasa Wilhelmina i mas despues tambe den e prizòn di bario di Kurá Spè. Manera ta yama bario di Koraal Specht den boka di pueblo.

                   Mi por bisa ku semper mi a trata di hasi mi trabou ku honor i segun mi konsenshi. Mi no ta pretendé di no a kometé ningun eror durante mi funshon, pasobra tur kaminda ku un trahadó ta ehersé labor por tin biaha ku, fuera di su boluntat, e por kometé un eror. Den tal kaso un despensa pa ken ku e por ta, ta na su lugá. Esaki ta demostrá un sintimentu konsiensudo i di bon rasonamentu i no di bèrgwensa. Na spañó tin un dicho ta bisa: ‘Lo cortés no quita lo valiente’. Ku otro palabra, kortesia no ta un señal di debilidat. Bo personalidat lo resaltá mas tantu di e forma ei.

                         Ami no ta pretendé di ta un di e mihó sipirnan ku tabata den funshon na prizòn. Pero loke sí mi no por aseptá, ta di laga mi for di fila di esnan determiná pa mantené un struktura sólido den funshonamentu di prizòn.

                   E potrètnan di ántes ta di Archivo Nashonal di Kòrsou. Fotógrafo di e potrètnan mas aktual ta Cathleen Giterson. Tin algun imágen di algun artefakto i plano di edifisio ku ta kortesia di mi mes persona. I fotógrafo di e potrèt di mi bistí komo sipir ta di un miembro di famia di mi.

​

                          Mi ta mashá agradesido ku yudansa di Drs. Brendalique Giterson ku a fungi komo tipista di e tantísimo tekstonan ku mi a skirbi atraves di añanan largu. Mi ta mashá kontentu ku yudansa di Angelique Giterson ku tabata mi aliado na kada momento ku mi tabatin mester di sea kopia òf kualke kos relashoná ku mi buki.  Un danki inmenso ta bai na Drs. Cathleen Giterson ku a fungi komo Wan shete fishi[2] di e buki akí i na señora Thelma Anthonia ku a yuda ku e parti di revishon di teksto.

 

                   Mi ta yama danki na demas personanan ku di un òf otro forma a kontribuí na realisashon i publikashon di e buki akí.

 

                                                                                               Juan C. Martis

 

_____________

[1] wardadó di prezu

[2] Un persona ku ta hasi diferente tipo di trabou, òf ku ta hasi uso di su diferente talentonan na momento  di ehersé un trabou òf tarea.