ta un eskritor, poeta, deklamadó, ilustradó, kontadó di kuenta,  kompositor di letra, animadó i kantante di kantika di mucha. E ta un èks dosente i ta perkurá semper pa su obranan literario i musikal, banda di e aspekto di dibertishon, tin aspektonan didáktiko i edukativo tambe aden. El a nase na Kòrsou i ta dominá e sinku idiomanan papiamentu, ingles, hulandes, spañó i franses. Cathleen ta gusta hari i ta gusta kosnan alegre mashá. Ta p’esei e aspekto chistoso ta kore manera un liña kòrá den mayoria di su obranan. El a hasi su debut na

2010 ku Djis un Pensamentu. Kolekshon di poesia i prosapoétiko, Tomo I, i  a lansa su website www.djisunpensamentu.com. Na 2011 a otorg’é e prestigioso premio Premio UNESCO pa idioma materno papiamentu den e kategoria profeshonal.  E ta skirbi rima, poesia, prosa, prosa poétiko, kantika, charada i kuenta. 

Cathleen ta un hende ku por poko a nase ku pèn i papel den man. Pasobra ta for di edat di mucha chikitu ku el a kuminsá skirbi su mes poesia, rima- i kantikanan. E tabata gusta para dilanti di spil ku su mikrofon den  man, ku tabata konsistí di sea un peña òf skeiru di kabei i asina tabata deklamá, kanta òf baila su mes obranan. Cathleen tabatin diferente amigu òf fanátiko imaginario na ken e tabata presentá su obranan literario.  Tambe e tabata gusta hunga skol ku diferente mata den pochi ku e tabata pone un tras di otro den rei.

Cathleen mes tabata traha su pòpchinan ku tabata konsistí di un simpel palu na kua e tabata mara sea streki òf repi di paña komo kabei. Tambe e tabata bòltu basora, mòp i harpa bok’abou i para kombersá oranan largu ku nan tokante tur kos. Su mama sí no tabata keda mashá kontentu ora e mester a mòp kas i e yega haña su mòp tur na kabei di flèktu ku elastik, ko’i kabei i streki aden.

For di chikitu Cathleen tabata gusta sinta pensa i traha su mes rimanan i su mes ‘novelanan’. E tabatin su personahenan imaginario fiho i tur anochi promé ku drumi e tabata inventá un kapítulo di su propio ‘novelanan’.

E tabata gusta e ora di bai drumi masha hopi mes pasobra ta esei tabata e ora pa e ‘krea’ su kapítulonan ku hopi plaser i goso. 

Di e manera akí Cathleen a desaroyá un vokabulario i un imaginashon amplio i kolorido ku a stimulá tambe su amor pa literatura i músika.

For di su 8 aña di edat e tabatin e plan pa saka un grabashon di su kantikanan, pero e plan ei no a logra bira realidat.  Na edat di 12 aña el a kuminsá okupá su mes seriamente ku skirbimentu di poesia. Pero semper el a bisa ku e ta skirbi pa su mes i no pa otro. Ku su 15 aña el a kuminsá skirbi diferente tipo di kansion prinsipalmente na ingles.

Sinembargo añanan despues, riba insistensia di algun persona, el a publiká na 2010 su obra literario pa tiner i adulto titulá Djis un Pensamentu. Kolekshon di poesia i prosa poétiko. Tomo I i a lansa su website www.djisunpensamentu.com, un website ku e lema: un E-magazine pa inspirá, eduká, konsientisá i entretené.

Cathleen ta gusta eksperimentá ku estilonan literario, gusta hunga ku idioma i ta skirbi tokante tur tipo di tema. E ta gusta mucha mashá i semper ta pèrkurá pa ora e skirbi òf publiká un obra pa mucha, pa e ta agradabel pa e muchanan i ku tin partinan tambe ku ta siña

e muchanan algu òf ku ta enrikesé nan vokabulario na un manera di wega i simpel.Kemen semper e ta pèrkurá pa e obranan ta edukativo, inovativo i agradabel pa nos muchanan.

Cathleen ta gran amante di naturalesa ku ta un fuente ku ta inspir’é tur dia i e ta gran fanátiko di tur tipo di músika.

Na 2012 el a partisipá na e Festival Literario Internashonal Krusa Laman. Na 2013, 2015 i 2016, el a partisipá komo outor na apertura di Siman di Buki pa Mucha di Boekhandel Bruna.

Su buki pa mucha titulá:

Arko Íris. 101 rima pa mucha ta mashá gustá serka e chikitinnan. Esaki ta un bunita buki kolorido pa mucha di 4 pa 8 aña ku hopi plachi di karikatura interesante i kómiko pintá pa Cathleen mes i tambe ku tep i informashon èkstra pa tantu mayor, yu òf alumno.

Komo Tanchi Cathy el a komponé i lansa e cdnan pa mucha: Arko Íris. 11 Kantika pa mucha i Arko Íris. Kantika pa mucha. Volúmen 2. E bukinan akí ta derivá mas ku klaro di su tan gustá buki di rima pa mucha. E cdnan akí ta chistoso i bastante rítmiko i bailabel.

Pa komplasé e chikitinnan na momentu di animashon durante hasimentu di aña di e chikitinnan, el a saka e cd Hip Hip Hurá. Kantika pa selebrá; ku piesanan alegre, chistoso i yen di zjeitu i energia ku tantu grandi komo chikí por suin bai bin ariba.

Pa nos tiner- i adultonan el a publiká Djis un Pensamentu. Kolekshon di poesia i prosa poétiko, Tomo I. Un tomo di poesia kargá ku tantu poema i prosa largu i kòrtiku, i ku ta trata un kantidat di estilo literario tantu kontemporáneo komo moderno. E buki ta di un karakter sosial-kultural i tin un ambiente netamente krioyo. Hopi di nos barionan/lugánan di Kòrsou ta bini dilanti (setting).

Igualmente nos kustumbernan (kuminda, músika, lenguahe di ántes i awor i artefaktonan típiko.  For di e obra akí el a derivá e cd spesialmente pa tiner i adulto titulá Djis un Pensamentu. Kolekshon di poesia rítmiko. Esaki ta un cd apart yen di melodia i ritmo ku ta alegrá kualke persona òf ku ta lag’é keda pensativo.

Cathleen ta un Wan shete fishi, esta e gusta hasi bon uso di su diferente talentonan ku Papa Dios a dun’é. E mes ta ilustrá su bukinan. E mes ta sòru pa tur su portadanan di tantu buki komo cd. E mes ta diseñá su website i su flyernan. E mes ta skirbi i sòru pa e parti di melodia di su piesanan. E mes komo fotógrafo semi-profeshonal ta esun ku ta sòru pa

imágen pa tantu su bukinan komo su website. Ataaa?! ... mas ku klaro ku yudansa di Djispi! (Mester menshoná esaki pa Djispi no rabia i plama paña bai.)

Cathleen a sigui e estudio di idioma i literatura spañó na Universidat di Utrecht na Hulanda kaminda el a optené e grado di doctorandus. Despues el a sigui e estudio di formashon di dosente post-doktoral pa optené su promé grado komo dosente. El a traha un temporada kòrtiku na un skol sekundario komo dosente di spañó. Despues el a bai traha na un instituto di idioma komo kolaboradó lingwístiko, prinsipalmente komo traduktor.

Tantu na Hulanda komo na Kòrsou el a huramentá komo traduktor sertifiká di spañó i hulandes i ta tradusí e mes tambe. E ta propietario di e agensia di tradukshon: CuraTranslations (Professional & Reliable).

Banda di tur esaki Cathleen tin diferente hòbi mas. E ta gusta dediká su mes na e arte di diseño gráfiko, e ta gusta pinta/skèts, i ta gusta e arte kulinario tambe, entre otro krea su propio resetanan i duna diferente preparashon di kuminda eksistente un toke personal i inovativo.

Na 2008 el a sigui un kurso di fotografia i a gana e kompetensia fotográfiko na final di e kurso tambe.

Cathleen su mannan no por para ketu. E ta gusta hasi obra di man tambe un mundu.

E ta proprietario di: WOW It UP! (Touch Up your Decor with the WOW factor); ku ta brinda tantu produkto i servisio riba tereno di dekorashon pa tur tipo di evento spesial manera kasamentu, boutismo, risibimentu i hasimentu di aña; hür di artefaktonan di dekòr i opsekio/produkto no komun trahá na man.

Cathleen Giterson ta propietario tambe di Tanchi Cathy Entertainment for kids. Esaki ta entretenimentu pa mucha (fiesta i evento). Tanchi Cathy ta entretené mucha mediante diferente aktividat manera kantika, baile, harimentu i otro aktividatnan físiko manera bulamentu. E ta bini ekipá ku su tambú i bòshi energia pa kuminsá ku e bembé.

E ta enkurashá e muchanan pa toka algun instrumènt rítmiko i pa partisipá den kompetensianan agradabel i leuk. Chiste- i charadanan apropiá, kombiná ku trahamentu di algun figura di blas, magia loko, algun presentashon disfrasá tambe por forma parti di e akto.

E ta bini ekipá ku su sistema di zonido pa kuminsá k’e fiesta.

Tanchi Cathy su show ta na papiamentu ku hopi di su propio kantikanan den nos dushi papiamentu, pero tambe algun kantika infantil tradishonal.

E por adaptá su show fásilmente na ingles, hulandes òf spañó.

kontakto riba e site akí òf mas ku klaro via su konfidente i man drechi:

 

                                                          Djispi Pensamentu.

Literatura i Entretenimentu.

Cathleen ta tambe un diseñadó akreditá, un dekoradó sertifiká, un profeshonal di kasamentu sertifiká, un hasidó di obra di man kualifiká i un artista di figura i eskultura di blas kreativo i sertifiká.

 

Ku otro palabra Cathleen ta gusta move hopi riba tantu área di Arte, Músika,

I mirando su gran amor pa idioma, no ta un sorpresa ku e website akí ta skirbí na 4 idioma.

 

Si kier drenta den kontakto ku Cathleen relashoná ku un òf otro di su abilidatnan por hasi esaki libremente via e medionan di

wpf9c31f2a_06.png

​FOLLOW ME

  • Facebook Social Icon
  • YouTube Social  Icon