Kolaborashon ku otro outor

KOLABORASHON KU OTRO OUTOR

Cathleen Giterson a yega di kolaborá ku dos outor mashá renombrá riba nos isla, riba un proyekto sumamente importante i interesante.

Ta trata akí di e proyekto BISTA RIBA PAPIAMENTU. Esaki ta un proyekto inisiá I kargá pa e tan konosido lingwista i eskritor di numeroso buki i estudionan hasí tokante nos idioma, Doktor Enrique Muller (†). E otro outor ta e gran papiamentista sr. Reginald Römer outor di entre otro e buki Sapaté, na bo sapatu! Mil i un ekspreshon, lokushon, refran, dicho, proverbio, paremia, adagio, anegin, sentensia, komparashon,

máksima pa mi pueblo.

Bista riba Papiamentu tabata un proyekto kaminda ku masha plaser Cathleen a duna su aporte pa por yuda kristalisá e proyekto aki. Ta trata di un estudio kaminda for di un punto sientífiko, pero skirbí di tal manera ku pueblo kompleto por a komprondé su kontenido fásilmente, ta trata diferente aspekto di idioma papiamentu. A base di diferente ehèmpel ta duna promé e forma inkorekto i despues mas ku klaro kon e forma korekto di sea frase òf partinan di frase ta.

Bista riba Papiamentu tabata un programa radial ku a keda presentá na radio-emisora Z-86. Durante un temporada largu tabata presentá kada biaha un kapítulo ku tabata trata un aspekto partikular di nos dushi idioma papiamentu.Tabata un temporada masha dushi kaminda tur siman e tres outornan tabata topa na radio Z-86 pa graba e kapítulonan, ku previamente a keda diskutí, trata i kumbiní den un grupo di estudio guiá pa Doktor Enrique Muller. E programa tabatin un bon akohida i e emisora a ripití e programa den su totalidat na vários okashon.

Debí na hopi petishon di radio-oyentenan pa hasi e kontenido di e programa aksesibel riba papel, a publiká e buki Bista riba Papiamentu i tambe un cd ku grabashon di e programanan.

NA KONTNUASHON POR HAÑA UN BISTA RELÁMPAGO DI E PROYEKTO AKÍ: