Tambe mi gusta chiste, charada, kuenta, letranan bunita òf profundo di kansion, tekstonan ku ta hasi uzo di wega di palabra òf ku na un manera mashá profeshonal ta hasi uzo di sentido dòbel, èniwei, den un palabra, mi ta gusta ‘idioma’. Tur idioma. I mas ku klaro mi ta stima mi lenga di kas, papiamentu un mundu. Pero mi no ta sigui kansa bo mente mas ku mi bòmbòshi personal, si bo ke sa mas redu di mi, ken mi ta etcetera etcetera, wak den e rúbrikanan konserní òf riba e kaft patras di mi buki.

​

Manera mi tabata konta bo. Ta p’esei mi a disidí ku awor sí a yega tempu pa Djis un Pensamentu. Kolekshon di Poesia i Prosa Poétiko. Tomo I hasi su entrada. I djis despues e idea di un website tambe a kuminsá ta molestiá mi sintí. E ora ei mi a disidí di hasi di un via ún manda. M’a buska un pastor i kasa buki ku website. Vipé kokoí. Ya asina un man ta laba otro. Di un banda ta danki na buki ku Website a keda kristalisá i di otro banda ta danki na Website ku buki a logra haña un promoshon den e rúbrika Buki/CD. Ke men pareha perfekto. Debí na e enlase matrimonial, tur dos a bira di mes tribu, esta Djis un Pensamentu. Un tin tur su nòmber kristiannan i nòmber di santu ku bo a lesa aya riba kaba i e otro ta www.djisunpensamentu.com.

​

I for di nan dos a nase Djispi (ku ya bo a òf lo sera konosí kuné, ke men keda bo trankil).

​

Sinembargo, mi tin un otro adrès di domein mas ku ta www.cathleengiterson.com.
E adrès akí ta di lenk na e adrès www.djisunpensamentu.com.

Dikon? Pasobra e website akí ta skirbí na 4 idioma, esta papiamentu, ingles, spañó i hulandes. Ke men e mes kontenido di e site, bo por haña ora bo klek riba e banderanan di e respektivo paisnan di e 4 idiomanan. I pa hasié mas fásil pa un persona ku no ta di abla papiamentu, tin e ora ei e adrès www.cathleengiterson.com, ya ta bira mas fásil pa nan tek e den nan browser i yega na e site akí.

​

Komo ku e buki- i cdnan ta kla publiká kaba i ya ta riba merkado lo mi no papia mashá di dje aki den. Importante ta sí pa mi splika bo tokante e website den su totalidat ya bo ta haña un bista di kiko e ta kome i bebe i ta kiko mi ke men ku un E-magazine.

Sinta duru, e rúbrika akí ta poko largu, pero no wòri unabes ku bo les’é un biaha ta kla. Bo no tin nodi di les’é nunka mas (M’a tende bo grita yeee! Pero no ta nada, basta bo bishitá regularmente tur e 29 rúbrikanan di kontenido.) Ku otro palabra e rúbrika akí ta un introdukshon di kon e E-magazine akí ta hinká den otro.

​

Manera tin pará grandi grandi ora bo subi e site akí, Djis un Pensamentu ta un E-magazine pa inspirá, eduká, konsientisá i entretené. Hopi di e rúbrikanan ta hasi uso di elementonan visual ku ta hasi e totalidat mas agradabel ainda. Hopi di nos gusta risibí e tipo di e-mail-, app- òf vidionan ku ta pasa di un kòmpiuter òf telefòn selular pa otro. Hopi ta prèt, otro ta pa inspirá bo, òf asta konsientisá bo. Hopi di nan ora bo lesa nan bo ta haña nan asina leuk ku bo ta kore ‘forward/share’, esta manda nan pa mas amigu i kolega pa nan tambe disfrutá di nan. Pero despues di tempu tin ku bo ta bin lubidá mes riba nan, òf ta leuk pa despues di un tempu bolbe gosa di nan. E idea pa e revista elektróniko akí a nase netamente di esei. Mi a kompilá diferente di e e-mail-, app- i vidionan ei i lo presentá diferente di nan aki aya den algun di e 29 rúbrikanan. Tin ku ta ami mes a traha (esakinan ta esnan ku tin abou na final Made by CG/Cathleen Giterson). Tin ku mi a kombiná i presentá den un bachi nobo (esakinan tin abou na final Presentation by CG). Sobrá ta simplemente manera mi a haña nan. Pa fasilidat tin algun file (esnan ku ta mi mes a traha) ku mi a kombertí di powerpoint pa vidio. 
 

Seguidamente lo mi pasa rápidamente den tur e rúbrikanan di kontenido pa bo haña un idea di kon nan ta i kiko nan ta trata:

​

1. Nabegando~: Esaki ta un rúbrika kòrtiku di pensamentu. Na un forma ku ta inspirá ta ekspresá un pensamentu.

2. Ékolekua!: Rúbrika di ekspreshon. Un ekspreshon, sea dicho, proverbio òf refran ta keda presentá na e kuater idiomanan ku bo ta tende mas riba nos dushi isla. Esta, papiamentu, hulandes, ingles i spañó. I na final bo ta haña su nifikashon na papiamentu.

3. Palabra di Dios: E rubriká akí meskos ku e rúbrika Nabegando~ ta trese un pensamentu dilanti na un forma ku ta inspirá, pero den e kaso akí relashoná ku Ser Supremo. Hopi be e tin keber ku proverbio bíbliko.

4. 'Sitasina': Rúbrika ku ta inspirá debí na su diferente sitanan di outornan famoso. Semper e promé sitanan tin keber ku sea dianan festivo òf kualke aktividat kalendario importante di e temporada enkuestion. Sobrá sitanan ta general. Por haña sita na tur e kuater idiomanan mas papiá riba nos isla.

5. Honor na Outor: Esaki ta e rúbrika ku ta duna honor na un di nos tantísimo outornan. E por ta outor literario, artístiko òf musikal. Aki por haña un tipo di biografia di e outor di turno i na final su pensamentu riba un tópiko ku e ta konsiderá di sumo importansia.

6. Tuma boka!: Bo por konsiderá e rúbrika akí komo un ‘follow up’ di e rúbrika anterior, kaminda e outor invitá ta presentá un di su poemanan. Si dado kaso ta trata di un outor musikal, lo e por presentá akí letra di un di su kansionnan. Si ta trata di un outor artístiko, lo e por presentá akí algun potrèt òf imágen di su obranan artístiko. Si esei no ta posibel e ora ei lo presentá un poema di un poeta di eksterior.

7. Viva Curaçao!: Esaki ta un fotorama di panorama òf paisahe di nos dushi Kòrsou.

8. Floria Memoria!: Esaki ta e rúbrika di ban bèk den tempu pa loke ta trata téknikanan poétiko. Diferente figura retóriko òf estilo literario ku probablemente nos tur a haña na skol ta bini dilanti aki, pa refreská bo memoria. Pero tambe por haña tep kon pa skirbi un poema, kuenta òf buki.

9. Papiamentu na barí: Aki ta nos dushi idioma ta bai papia poko na barí. E mes lo duna tur detaye for di su nasementu te su posishon aktual. Tur trabuko ku el a topa pero tambe kon e mes ta mira su futuro pará na horizonte ayá. Lo bo yora bo tristesa i kanta bo legria samsam kuné. Semper na final di e rúbrika akí tin un parti yamá Papia Papiamentu. Ei papiamentu ta sea kritiká òf presentá sierto aspektonan pekuliar ku e ta topa den su kaminda.

10. Ata palabra!: Esaki ta un rúbrika kòrtiku ku ta trata sea palabranan (arkaiko) di nos lenga papiamentu òf ekspreshonnan ménos koriente den nos ablá di tur dia. I di e manera akí Ata palabra ke presentá nan pa nos rebibá nan i den kaso di e ekspreshonnan kurashá nos pa usa nan mas tantu. Aki tambe por profundisá den historia/nifikashon di sierto palabra òf ekspreshon. 

11. Zanpèt: Rúbrika ku ta duna informashon tokante medisina natural, yerba krioyo i nan uso.

12. Bo tabata sa?: Esaki ta stail di un kues ku ta tèst bo konosementu general.

13. Memo: Tur tipo di tep. Tin hopi tep relashoná ku mantenshon di kas òf produktonan doméstiko, pero tambe por haña tepnan pa den kurá, tepnan relashoná ku mantenshon di outo, kuido personal etc.

14. Ñùmi ñùmi: Esaki ta e rúbrika di reseta. Tur biaha lo presentá un dushi reseta ku lo laga un i tur su boka kore awa.

15. Man na obra!: Rúbrika di obra di man. Aki den, na un manera mashá simpel, bo ta haña idea kon pa traha algu práktiko for di sea material desechabel, material ku kasi tur hende tin na kas, òf algun material no muchu karu ku bo por kumpra i traha algu kuné òf kombin’é ku p.e. material desechabel. Ke men ku nada di sèn òf ku poko sèn ta siña bo, den e tempu karu di awendia, kon pa traha algu bunita, práktiko i tin biaha asta úniko. Di e manera akí ta kurashá bo pa ekonomisá i alabes stimulá bo pa ta mas kreativo hasiendo uso di bo mes mannan.

16. Pens’é!: Rubriká edukativo di vidio òf teksto pa saminá bo konsenshi.

17. Paga tinu!: Aki por haña informashon, atvertensia (médiko) riba un tópiko. Esaki ta un rúbrika informativo relashoná ku salú di hende. Dado kaso si e tópiko ta un tiki pisá (kisas informashon médiko kompañá pa potrètnan poko gráfiko, lo anunsiá esaki. Si ta trata tópikonan mas bien pa adulto lo pone [18+] tras di nòmber di e rúbrika riba e site pa anunsiá esaki.

18. Nos tesoro!: Pa medio di bunita potrèt saká ta enfoká kada bes riba un tesoro di nos dushi Kòrsou. E por ta un monumento, un lugá òf opheto históriko i ta duna informashon kòrtiku i alkaso di e tesoro skohí.

19. Basha, Djispi basha!: Esaki ta espasio di nos konfidente Djispi. Djispi ta na palabra den e rúbrika akí i e lo bai basha pensamentu pa tur su ‘pensamentistanan’, manera e ta yama nan. Ta trata di komentario skèrpi riba un òf mas tópiko relashoná ku kualke aktividat kalendario di e temporada di aña konserní.

20. Bo pensamentu (?): E rúbrika akí ta un ‘follow-up’ di e rúbrika anterior di Djispi. Aki Djispi ta duna tur su pensamentistanan e oportunidat di basha nan mes pensamentu tokante e pensamentunan ku Djispi a trese dilanti den su rúbrika. Un i tur por tek i mail su pensamentu relashoná ku esei pa Djispi. Tambe nan por reakshoná riba pensamentu di otronan ku a publiká esei kaba. Ke men por konsiderá e rúbrika akí komo un tipo di foro kaminda tur hende ta bon biní pa reakshoná. Mas ku klaro mester tene kuenta sí ku e reglanan di wega ku por lesa den e parti ei di e rúbrika.

21. Tertulia: Den e rúbrika akí por haña hopi potrèt di sea un aktividat artístiko, literario òf musikal i kisas asta kompañá pa algu di informashon tokante e aktividat i kon el a bai.

22. Un mundu!: Aki ta duna un informashon/pensamentu pekuliar, interesante, edukativo òf chistoso di kualke pais na mundu (e por ta un vidio tambe).

23. Morde bo rabu!: Si bo ta un hende ku gusta traha pùzel pa mata tempu. At’akí un pùzel di kolebra. Si bo no por solushoná e pùzel akí e kolebra lo pika bo mata. Asina ta, bo mester sak'é, laga e kolebra rabia kunsumí te ora e morde su rabu.

24. Guera di sekso [18+]: Husga pa bo mes ta kua sekso realmente ta e sekso débil i kua e sekso fuerte. Chiste relashoná ku hende hòmber i hende muhé. Destiná pa persona mayor di edat.

25. Hi-Ha-Ho! [18+]: Hari te lora abou, ku e kompilashon di chiste bunita presentá akí. Destiná pa persona mayor di edat.

26. Ra ra ra!: Rúbrika di charada. Bo kièr sa bo ta mashá sabí, no? Awèl, ban mira. Laga mira awó kon inteligente bo ta di bèrdat.

27. Punto di bista: Mira i rei ken òf kiko mi ta. E rúbrika akí ta den e trènt di e rúbrika anterior. Solamente aki e ta den stail di un kues, kaminda kada bes na kuminsamentu bo ta haña un hent di kiko bo ta bai mira. Seguidamente lo bo mira kada bes algun potrèt denter di sinku stap (sinku potrèt). E promé tres potrètnan ta laga bo mira un potrèt apstrakto (di mas apstrakto pa ménos apstrakto) ku durashon di dies sekònde, kaminda bo mester rei ta kiko bo ta mirando. E di kuater potrèt ta poko mas visibel i ta p’esei bo ta haña sinku sekònde pa rei. E di sinku i último potrèt ta e kontesta di e charada (palabra òf frase) ku a puntra na kuminsamentu di e sekshon ei. E kek di e rúbrika akí ta ku bo no por basa bo únikamente riba e hentnan pasobra nan por ta un tiki rebuská. Mihó ta si bo basa bo riba loke bo ta mira. P’esei e título ‘punto di bista’.

28. Ata pa bo gosa!: Mas chiste. (Pasó nos sa ku b’a gusta.)

29. I e ganadó ta: Konkurso ku Djispi ta hasi pa tèst su pensamentistanan, pa wak si nan a pone atenshon na su site. Djispi ta anunsiá ken ta e ganadó den e edishon ku ta sigui di Djis un Pensamentu. E ganadó ta haña un ehemplar di Djis un Pensamentu. Kolekshon di Poesia i Prosa Poétiko. Tomo I serka Djispi.

​

 

Mayoria rúbrika di Djis un Pensamentu no ta muchu largu, pero por tin algun sí ku ta tuma mas tempu pa sea lesa òf mira nan. E idea ta pa bo subi ku regularidat i lesa òf mira e kontenido tiki tiki. Mas ku klaro si bo ta disponé di tur tempu di mundu, bo por sinta na bo patarata grandesa i gosa di nan den un tiru. Pero kòrda ku esaki no ta nesesario ya komo ku kada edishon di e E-magazine akí ta keda aksesibel durante un aña largu.

 

Nos ke rekòrdá tur hende, prinsipalmente mayornan ku e website akí ta mas bien destiná pa personanan mayor di edat, debí na debesenkuando sierto tópiko mas bien dirigí riba personanan adulto, òf sierto chiste kisas poko pikante. Sinembargo nos por trankilisá tur hende ku no tin nada di bulgaridat, ni imágen bulgar riba e site akí. Pa fasilidat nos lo pone manera nos a menshoná anteriormente kaba e símbolo akí [18+] tras di nòmber di e rúbrikanan konserní. Ke men mayornan ku yu menor di edat, paga tinu riba uso di internèt di boso yunan.

 

Tambe ta bon pa apuntá ku si bo ta un persona ku un pa dos ta kla pa kik, ku no por ku wega, ku chinchan un kos ta kla pa rabia i kritiká, ku ta tuma bida muchu na serio i ku ta kla pa kunsumí riba nònsèns, antó mihó bo no subi e site akí mes pa bo preshon no subi. Esaki prinsipalmente pa loke ta trata e chistenan. Pero si bo ta un persona ku sa kon balansá bida i por ku wega i ta kla pa hari kualke ko’i loko, antó dal bai. (P.s. by the way, lo bo biba largu, òf aloménos lo bo biba bon!, (opservashon di Djispi).

​

Nos ke bisa ku apesar ku nos ta skrudiñá mashá pa wak ta kua tipo di informashon nos ta pone, tòg nos ke pone bon kla ku bo no por eksigí ningun derechi for di kontenido di e site akí. Ta trata akí mas bien di e rúbrikanan general ku no ta nos mes a traha. O sea, e-mailnan ku a drenta via di nos inbox. Ta keda na kada ken dado kaso bo ke usa e informashon duná mas aleu, pa bo mes dòbelchèk e grado di su verasidat.

 

Kòrda bon ku e site akí ta universal. E ta un site di pensamentu i no papiamentu. Ke men banda di nos dushi papiamentu, ku nos ta stima mashá, bo ta haña tambe otro idioma ku regularidat.

 

Manera nos a bisa na kuminsamentu Djis un Pensamentu ta un E-magazine pa inspirá, eduká, konsientisá i entretené.

 

​

Na kontinuashon nos ta duna bo un skema di repartishon di e rúbrikanan: