TUMA BOKA!

Na kontinuashon ta haña dos fragmento di e outobiografia BIDA DI UN SIPIR. Relato di susesonan di e último añanan di prizòn na Plasa Wilhelmina i e promé añanan di prizòn na Koraal Specht skirbí pa Juan C. Martis:

...

Un sipir ku tabatin mas tantu aña ku mi den servisio a bisa mi un biaha: ‘Martis, mi ta bai konta bo kiko a yega di pasa ku mi riba un dia ku mi a saka algun prezu pa bai kue awa di laman. Mi a saka ocho prezu pa bai hasi e trabou. Ora nan a kaba di karga awa di laman i ku mi a pasa nan paden i a konta pa mira si tur tabata presente, mi a ripará ku tabata falta un. E ora ei mi a kuminsá ku un investigashon i a bai wak den e sekshon kaminda ta ser’é. Pero e no tabata ei. Mi so a keda ta pensa i mi a bin kòrda ku tabatin un momentu ku un di e prezunan a yama mi i bisa mi ku un di e haknan di tòn tabata poko lòs. Mi ta kere ku ta ora ku mi a lanta fo’i stul pa bai wak situashon dje hak dje tòn, ku e prezu akí lo a mira chèns pa move bai.

                   Awor Martis, kiko bo ta kere e yu di puta akí a hasi? El a pasa aya tras, entre e muraya di prizòn i laman, lora banda di e ofisina di telefòn i bai mèldu dilanti serka e komandante di prizòn. Imaginá bo! Tabata djis un aktitut pa laga ami keda ridíkulo enfrente di e komandante i pa e gosa di mira mi risibí un bon skual tambe. Ademas e desgrasiado a duna mi e molèster di mester a traha un ‘verweerschrift’.[1]”

...

Pág. 24/25

​

​

                   Tenementu di warda, prinsipalmente anochi, tambe a konvensé mi ku den prizòn un sipir mester ta alerta tur ora bai i kla pa duna resistensia ora esei tabata nesesario pa por a skapa for di un pèrtá.

                   Un anochi mi a subi warda i a bai kambia pòst ku un kolega den sekshon di aresto preventivo. Mi a repasá e formulario ku nòmber di tur prezu i nan number di sèl. Mi a bai kontrolá pa konvensé mi mes ku tur prezu tabata presente i ku tur slòt di porta tabata bon será. Ora mi a yega na un sèl na e piso ariba mas den huki, kaminda e murayanan i dak tabata forma un skuridat, mi no a mira e prezu di inisial R ku mester tabata den sèl. E detenido akí di un manera astuto a pega su kurpa na e pida smal di muraya ku tabata keda na banda di e tralinan di sèl. Mi a hala un tiki mas aserka i hasi uso di mi flèshlait pa lusa den e sèl pa mi mira si di bèrdat e sèl tabata bashí. Ora ku mi a hisa mi brasa ku e flèshlait den mi man, prezu R ku un liheresa inkreibel a hasi un maniobra i kue mi brasa tene duru. Mi a laga flèshlait kai pa trata na saka mi brasa for di su gara. Mi mester a trata tambe pa tene mi kurpa na distansia pa e no yega na mi armanan reglamentario di servisio. Mi mester a hiba un lucha tenas birando mi brasa di tur forma pa trata na libra mi for di e  detenido akí. Mi no a haña ni chèns pa saka mi flùit pa por a pidi yudansa. Ora mi a kuminsá sinti mi kansá i tabata pèrdè forsa, mi a haña un solushon. Mi a benta mi kurpa abou na suela. Su brasa a kuminsá primi riba rant di e plachi di heru horizontal ku tabata sostené esnan vertikal. E ora ei numa el a laga mi brasa bai. Mi a dònder abou i dal mi kurpa duru. Pero mi a bula lanta na tempu i logra dominá e situashon. No ta mi kustumber di usa ekspreshonnan insolente, pero e anochi ei sí mi a manda diferente di nan.

...

Pág. 123/124

[1] Apologia; un dokumento kaminda un hende mester defendé su kurpa kontra un akusashon.