Hei, kerido pensamentistanan, kon ta bai?

​

Ata Djispi akí kla pa basha bou, pone hopi pensamentu floresé!

Den e edishon akí Djispi ke kompartí lo siguiente ku boso: Kampion sin Korona.

 

Esta baina no? Ta unda e kos ei ta antó? E karizu ta skonde pa Djispi asin’akí? ! Nò, nò, nò ... No por! Tende un kos akí, no ... Mihó bo sali duna kara promé Djispi dal bo un wanta, laga bo drai mané tròm bai kibra na wèrki, b’a tende! Djispi no ta bo pareu! ... Atááá?! Shonnan, ta bosnan t’ei atrobe? Esta kos, no? ‘Lòntaim!’. Ta masha ora boso t’ei? An sí? Atá? Nò, nò, no spanta. Djispi no ta agresivo no. Djispi ta masha ‘peaceful’. (Aunke kisas mas ‘full’ di nèrvio ku di ‘peace’. ) Pero shonnan, bosnan n’ sa dikon? Ta pasó ta masha ora Djispi ta buskando e maldito korona ei sin por hañ’é. Sí! Djispi tin korona. Kiko? Bosnan no tabata sa? Pero Djispi lo bini bèk riba esei un djis.

 

Ai si yu, un korona ku Djispi a yega di gana den tempu di Djispi su ‘jonge jaren’ nan. Am, am ... No komprondé Djispi malu. Djispi ta sprinchi sprinchi ketu bai. Pero esaki ta algu ku Djispi a haña dia Djispi tabata super mas sprinchi. Yu laga Djispi konta boso un kuenta den purá akí:

 

Durante reinado di Rei Metusalèm, nan a organisá un kompetensia pa tur pensamentista. Bo mester a presentá diferente pensamentu dilanti pa mira ta kua di nan ta kai na agrado di Rei Metusalèm. Kada kontentinente inkluso universo por a partisipá. A bini diferente ganadó di nan respektivo lugá pa batayá pa konkistá e título asina kodishá: ‘Pensamentista Mayó’! Ai, shonnan; pensamentistanan di ‘all around’ a partisipá. A bini pensamentista for di espasio ku a presentá nan poema:

 

U YU YUI

U YU YUI

U YU YUI

U YU YUI

 

Pero Djispi lo bini bèk riba esei un djis.

 

Representantenan di Reino Animal a forma un kor i presentá tremendo konsierto pa purba deleitá Rei Metusalem su oido ku nan poesia ritmiko:

 

Wuf wuf, miau, grrr.

Kuèk kuèk, chip, sss.

Pip pip, kokoyoko, mèèè,

Zum zum, ròar, bèèè

 

Pero Djispi lo bini bèk riba esei un djis.

 

I for di Reino di Montekristo. DejaVu Airlines a trese un grupo ‘del mas allá’ ku a laga Rei Metusalèm su Bilirubina subi ku Stairway to Heaven, ora ‘uit volle borst’ (òf mihó bisá: ‘uit volle geest’) nan a kanta nan Ópera, den tono di do re mi fa sol la si do:

 

Wuuuuuuuuuuhhhhuuuuuuuuhuuuuuuuhuuuuuuuhuuuuuuuuhuuuuuuuhuuuuhhhhuuuuuuuuuu~~~

 

Aaaam. Pero riba esei sí Djispi lo no ke bini bèk ètòl.

 

 

Shonnan, pa hasi un historia largu kòrtiku. Ora Djispi a yega pa representá boso tur, esta Reino di Pensamentistanan i Djispi a subi podio i kuminsá basha poesia, prosa, prosa poétko, kantika i rima un tras di otro, ... Rei Metusalèm a bula lanta fo’i su stul i blo keda ta aploudí Djispi. Manera boso mes ta komprondé. No tabatin awa pa laba. Ganadó apsoluto a resultá:

Tara ta ta!!! Djispi ‘Djispilicious’ Pensamentu. Sigur no! Ta Djispi akí a bai ku e korona, b’a kere ta wega? Antó esta un KORONA! Un korona kodisiá pa ‘todos’. Tur djariba, djabou i di meimei. (Si bo ta ‘begrijp’ loke Djispi ta ‘bedoel’.) Pero Djispi lo bini bèk riba esei un djis.

 

Awèl, ta e korona ei Djispi ta buskando akí sin por hañ’é. Ta tur biaha ta meskos. Kasi nunka mi no ta hañ’é mira. E malditu korona ei si sa nèk! E gusta hunga tapakara. E no sa ku bo no por hasi un kos asina ku hende grandi? Kòrda sí ku Djispi ta e ùmpi dùmpi di Famia Pensamemtu. Kemen no kumpra Djispi pa muchu bieu tampoko. Ablif? Kon? Bosnan a spanta ora boso a tende ku Djispi tin korona? Ai nò shonnan, bosnan tambe sa nèk! Bosnan ko’i spanta ta na punta. Nò, yu! Pero boso tin tur rason sí. E korona ei sí ta un korona ku Djispi no ke mira ni pintá. Ata sòri. Djispi tambe sa papia ko’i kèns, no? Bo no por mir’é, tòg? Pero Djispi lo bini bèk riba esei un djis.

 

E vírùs korona ei ta un vírùs traishonero ku ta tur kaminda. Rònt mundu e ta. Sinembargo nos niun no por mir’é gewon asina ku wowo. Dios spar hende. Dios libra nos di dje. Ta hopi tristesa el a kousa kaba rònt mundu. Ta p’esei nos tur mester distansiá di otro pa evitá ku un pensamentista ta kontaminá e otro pensamentista. Ata e asuntu di keda kas mas tantu posibel, no sali riba kaya sin tin nada di hasi etcetera, no ta ningun problema pa Djispi. Pasobra Djispi akí tin ko’i hasi ‘de sobra’ pa etretené Djispi mes i tambe tur Djispi su pensamentistanan. Bosnan no ta kere Djispi? Wet’akí yu. Ora Djispi kuminsá marka paso, bula, baila, drai rònt stail di ‘regendans’, bati man, kanta, grita te raspa Djispi su korokoro ala Tarzan den balkon Ohohohohoho, ta henter Djispi su bario ta kuminsá tira Djispi ku stroistro. Sigur no! Antó nan ta kreativo i solidario tambe ku Djispi. Pasobra ora papel di krèp, slenger i konfèti di oro kaba ku nan, tòg nan no ta stòp di tira stroistro. Nan ta improvisá i tira asta webu, tomati, siboyo, blek kòrn bif ... ai loke nan tin. Sigur no! Ta mané ku nan sa ku Djispi su provishon ta kabando i ta p’esei Djispi ta kere nan ta sustentá Djispi di e forma ei ku tur e delisianan ei. Ounke Djispi kièr sa ku hopi di nan sea no tin frishidèr òf esaki a kaba di daña. Pasobra Djispi ta haña si ku bastante di e produktonan ei tin un holó manera poko straño sí. Pero èniwei ... ‘lo que no mata, engorda’. Rei ku Djispi kièr sa ku Djispi su ‘bògi bògi’ a reis un poko den henter e asuntu di karentena, ‘toque de queda’ i ‘shelter in place’ akí. Pero Djispi lo bini bèk riba esei un djis.

 

Djispi a ripará ku nos ta mané un tiki demasiado sin heful sí. Ta mané kos ku tur bolo  nos ta buska moda di chumba. Dia no tabatin ‘Toque de queda’, hopi hende tabata blo puntra: “Ma bon, ta ki dia ta introdusí ‘Toque de queda’ pa kaba antó. Ta ke nan ke pa nos pega ku vírùs?” Ora a introdusí ‘Toque de queda’ i ‘Lockdown’ hopi tabata burdugá ku nan ta fadá di e kuenta di ‘Keda Kas, keda kas, keda kas’ akí i k’e pa nan kita e kuenta di ‘Lock up side down’ pa kaba. Ora a kuminsá kita nan, ta manera ku ta barku a kibra. Hendenan a kuminsá subi kaya manera vruminga loko. Hopi ke keiru, baila, pega riba otro manera karpata riba kueru di kachó, pasobra nan no ke tende kuenta di ‘Nòrmal Nobo’. Nan ta sinti falta di ‘Nòrmal Bieu’. Awèl Shonnan ta nèt awor Djispi ta dal porta sera ku ‘Slòt i Grèndu’ i keda p’aden mas tantu posibel. Pasó ta nèt ora kurá di kabritu plama na wèrki asin’akí, ko’ ta pasa! Awèl, Djispi sí di ‘Niki!’. Pero Djispi lo bini bèk riba esei un djis.

 

Shonnan, Djispi tin un Komèr mashá stimá ku ta gusta buska Djispi su drechi den henter e asuntu di keda kas i kuida kurpa akí. Antó boso no por rei kon e yama. Korona! Si asina mes. Korona Altagrasia Bendita. Asina e shon yama. Pero pena la bida bo yam’é na su nòmber kristian. E ta bira Coro pa Caracas i kumindá tur bo antepasadonan ún pa ún na nòmber i fam. Pero ta di komprond’é. Den e tempu di awendia ta ken lo ke tin un nòmber asina bèrdat. Djispi ta yam’é Shon Grasia. Awèl, shonnan. E biahanan ku Djispi por sali fo’i kas, Djispi ta pasa i hiba semper algu di grasia pa Shon Grasia. Hahai! Duna ta muchu mas dushi ku tuma.  Kon ku bai bin, nos tur semper mester kombibí bon ku otro. Prinsipalmente den e tempunan akí. E malditu vírùs korona akí lamentablemente a kaba ku bida di hopi rònt mundu. Pero algu tambe ku el a hasi ta, di laga mundu kompletu mira ku kosnan material no ta bal nada. Bo por tin kuantu sèn, ku bo ke, pero malesa por bati na porta di nos tur di un dia pa otro. E por presentá  serka riku i pober. Grandi i chikí. Blanku i pretu. Pensamentista i no pensamentista. Pero Djispi lo bini bèk riba esei un djis.

 

E vírùs Korona, mihó konosí komo Covid 19 akí, a laga mundu para ketu pa mustra nos ku salú ta mas importante ku kosnan material. Pasó sin salú bo no tin bida te pa bo por disfrutá di kosnan manera nos lo bisa den boka di pueblo, kosnan di ‘bon bida’. Ta p’esei nos tur mester kuida nos mes i kuida otro tambe. Stòp di buska ribirishi, bòmbòshi, guera, tróbel, pelea, pleitu, pompamentu, pompashi, pompaderia ... Èniwei, boso ta ‘get the picture’ (aloménos esei Djispi ta spera, antó). Kemen den un palabra: Stòp! Stòp di buska problema. I kuminsá biba manera Dios ta deseá pa nos biba ku nos mes i ku otro. Pero Djispi lo bini bèk riba esei un djis.

 

Shonnan nos mester biba nos bida na un manera korekto ya ora ‘JUDGEMENT DAY’ yega nos no tin nodi di buska Terminator pa bin defendé nos. Pasobra Djispi ta kere tantu Terminator I, Terminator II, Terminator III, èniwei tur e Terminatornan ku tabatin ei, nan mes lo bisa bo ‘I’LL NOT BE BACK!’ i saka kareda kore limpi bai den futuro laga bo. Ni maske bo buska un buraku pa kore hinka bo kabes aden ala abestrus, di miedu pa La Muèrtè no hiba bo na un adrès pió ku Hotèl California, tòg lo no tin awa pa laba. Pasobra kaminda lo bo bai ei lo ta Super kayente ku tur awa lo evaporá di biaha. E ora ei sí ‘pará lo daña’ bira un tutu[1] sin manteka, sin koko i sin keshi. At’é! E palabra mágiko a kai. Mara Djispi por haña un tayó aworakí mes, Djispi ta basha kareda bai, stòp di basha i kuminsá fretu na Djispi su ehehe. Mir’akí yu, suta Djispi ta suta e kos ei mand’abou. Pero Djispi lo bin bèk riba esei un djis.

 

Pensamentistanan ya komo ku Djispi a tende kuenta di tutu, Djispi su wowonan a kuminsá bira rònt den Djispi su kabes, Djispi su boka a kuminsá kore awa i ya Djispi no por PENSA nèt nèt nada mas.

 

Asina ta Djispi ta djis plantia e siguiente proposishon:

 

Laga nos kuida nos salú, sòru pa higiena, sòru di biba un bida trankil, biba bon ku otro, sin mata kurpa pa logra yega na rikesa material. Djis wak rondó di nos. Tin rikesa na tur manera. Kisas ta mira nos wowonan no ke mir’é. Hopi di nos ke logra hopi den bida. Nos ke gana semper. No komprondé Djispi robes. No tin nada malu den esei. Bringa pa bai dilanti, pa progresá, pa ta un kampion, ta algu bon. Pero ta dependé di ki forma bo ke i ta hasi esei. Hopi di nos ta kere ku ta ora nos gana algu so nos ta bira un kampion. E or’ei numa nos ta konta. Kaminda hopi di nos ta un kampion kaba sin sa. Tin un kansion ku yama: Kampion sin Korona ku Djispi tabata gusta tende ántes mashá. Awèl shonnan, nos tur por ta un kampion. I prinsipalmente den e era nobo akí di malesa i vírùs, laga nos tur ban hasi tur loke ta nesesario pa por ta un Kampion SIN KORONA.

​

Djispi ta bisa bo djis kòrda esaki: Si bo ke ta un kampion, djis hasi bon!  Pero Djispi lo bin bèk riba esei un djis.

 

Asina ta basha bo pensamentunan den e siguiente rúbrika. Awor ta turno pa ABO trese Bo pensamentu (?) dilanti tokante e tópiko: Kampion sin Korona.

 

Tutu tutu turesten, kuida boso kurpa i te e siguiente okashon ku Dios su poder.

 

Duike, duike