A man is not finished when he's defeated.

He's finished when he quits.

                                                                                       Richard M. Nixon
 

Kerido lektor,

 

                   Awor ku mi ta skirbiendo e buki akí pa publiká, mi tin di bisa ku lo mi a preferá di por a trata un tema romántiko, kolmá di sintimentunan agradabel pa un novela òf di skirbi un historia épiko di un lider òf un héroe nashonal, pa ser atmirá i elogiá. E motibu dikon, ta pa evitá di tin ku trese rekuerdonan desagradabel i kruel di den pasado na publisidat. Sinembargo debí na mi sentido di sivismo mi ta haña mi ta trese mi historia dilanti.

 

                   Na e momentu akí mi ta trese susesonan diario ku mi a eksperensiá  i akumulá pa e buki akí, ku e firme konvikshon ku lo e kontribuí ku un pipita di santu na formashon di e hóben sipir aspirante ku ta òf lo forma parti di konstelashon di un kuerpo di sipir. Ohalá ku den e sentido akí mi historia por aportá na mas sabiduria pa e sipirnan ku den nan funshon ta konfrontá asina tantu kontratempu i ku na vários okashon por sinti falta di e respaldo nesesario pa por kumpli ku un bon trabou.

               Esaki ta loke ami a sinti falta di dje na vários okashon den mi afan pa kumpli ku mi labor. Si un sipir ta hasi su trabou segun su instrukshon reglamentario, e ta spera tambe di haña respaldo pa e por kontribuí na mantenshon di un struktura firme den maneho di prizòn. Den mi funshon mi a trata semper pa e prezunan haña tur loke nan tabatin derecho riba dje. Pero nunka mi no a hunga e wega di ke ta un bon tèrsio i faya ku reglamento di prizòn, simplemente pa gana simpatia di un prezu. Pasobra e sistema akí por pone ku un kolega, ku sí ta hasi su trabou manera mester ta, ta keda mal mirá serka  e prezunan ku no ke mantené nan mes na reglamentonan di òrdu. Esaki ta hasi ku un sipir, den kumplimentu di su tarea, por hañ’é ku hopi traba den su kaminda pa pon’é trompeká i pèrdè perspektiva di e vishon ku e por tin pa forma su futuro. Forsanan aheno di su boluntat ta trata na desvi’é for di e meta ku el a fiha ariba. Maniobranan maligno por bai asina leu, di purba na impedí e hóben akí di e  kos di mas presioso ku ta su bida.

                   Esaki ta e realidat ku na un edat relativamente hóben mi a eksperensiá,  durante kumplimentu ku mi trabou komo sipir den e prizòn na Kurá Spè. Mi tabata un hóben ku tur e kualidatnan pa por a abundá e máksimo den mi karera. Sinembargo mi a kai víktima di plannan maligno di mentenan kriminal. P’esei mi no por a tapa boka, frena mente i keda den silensio. E impulso den mi kurason a pone mi dedenan move pèn riba papel pa di e manera ei revelá e aktonan di inhustisia sin ningun motibu kontra mi persona, ku mi tabatin di soportá.

                   Den e buki akí, kaminda ta nesesario, mi ta usa inisial na lugá di nòmber kompleto. Dikon? Esei ta pa protehá sea prezu òf sipir. Pasobra, ora ta trata di prezu, e prezunan ei a sinta nan kastigu kaba i mi no ta haña ta nesesario trese nan nòmber na e momentu akí den publisidat. Ora ta trata di por ehèmpel sipir, debí na e situashon òf e kaso, mi a haña ku ta mihó pa tene nòmber di sierto sipir anónimo, mirando ku, atrobe segun e situashon òf e kaso, e nòmber  mes no ta relevante. Kaminda ta nesesario lo  hasi esei tambe ku mas hende.

                   Kaminda mi a husga, segun e kaso (di sea gradisimentu, krueldat òf inhustisia), ku esei no tabata nesesario òf deseabel, mi a menshoná sea nòmber òf fam di sierto persona.

                   

Mi ta spera ku un i tur por komprondé ku mi determinashon pa skirbi e buki akí, ku mi a titulá BIDA DI UN SIPIR. Relato di susesonan di e último añanan di prizòn na Plasa Wilhelmina i e promé añanan di prizòn na Koraal Specht, no ta ku e intenshon pa gana ningun premio literario komo eskritor, ni pa difamá ningun instansia òf persona. Ta trata akí simplemente di un sintimentu ferviente ku a originá paden di mi ser, ku atraves di añanan a keda kushi den mi interior, ku e gritu di tin ku sali un dia na kla. E sintimentu amargo akí, despues di tantu lucha pa sobrebibensia, a keda sklama pa hustisia.