Komunikado di prensa di e buki BIDA DI UN SIPIR. Relato di susesonan di e último añanan di prizòn na Plasa Wilhelmina i e promé añanan di prizòn na  Koraal Specht
wpf9c31f2a_06.png

BIDA DI UN SIPIR

 

Relato di susesonan di e último añanan di prizòn na Plasa Wilhelmina i e promé añanan di prizòn na Koraal Specht

 

WILLEMSTAD - BIDA DI UN SIPIR. Relato di susesonan di e último añanan di prizòn na Plasa Wilhelmina i e promé añanan di prizòn na Koraal Specht ta un impaktante outobiografia  ku  a kaba di sali riba merkado destiná pa komunidat di Kòrsou i mundu kompletu. Juan C. Martis ta outor di e buki akí.

 

Juan C. Martis ta un sipir (wardadó di prezu) ku a laborá tantu na e prizòn na Plasa Wilhelmina komo na esun na Koraal Specht. Den su outobiografia e ta skirbi tokante su eksperensianan komo sipir i òpsegter na prizòn den añanan 50, 60 i 70. Su determinashon pa hasi un bon trabou i na mes momentu duna su kooperashon pa mantenshon di un struktura firme den funshonamentu di prizòn, no semper a keda honrá pa gerensia di prizòn di e époka ei. Inkluso el a hañ’é, na diferente okashon, tin di lucha pa su derechonan komo trahadó i komo ser humano. Durante su trayektoria komo sipir, na vários okashon, e tabata sinti manera ta é mes tabata esun será tras di trali i no vice versa. El a topa hopi traba den su kaminda pa e simpel motibu di ker a traha su trabou na un manera hustu i profeshonal. Maniobranan maligno ker a kita e kos di mas presioso, ku ta su bida. El a bira víktima di plannan maligno di mentenan kriminal. Pero su enorme forsa di boluntat i su fe infinito, a pone ku e no a entregá nunka. Den e buki akí e ta konta na plaka chikí kon den karni bibu el a sufri un monton di humiashon, diskriminashon i inhustisia i kon tòg  el a sa di mantené su fe i dominio propio.

Òpsegter Martis a haña un aksidente na aña 1974 durante ku e tabata ehersé su funshon na man di un notorio kriminal di e épokanan ei i e suseso akí tabata tur kaminda komentá den medionan di komunikashon riba nos isla. El a dediká henter su bida despues na skirbimentu di su historia pa trese e bèrdat dilanti i asina aklará diferente kos ku a keda tresé dilanti inkorektamente. Den e buki akí Juan C. Martis ta deskribí su odisea pa haña hustisia.

 

Juan C. Martis a logra mira i tene dos vershon di prueba di su outobiografia den su mannan ku masha plaser i orguyo. Lamentablemente poko tempu despues Papa Dios a tum’é den su reino.

Di e manera akí nos ke pone komunidat di Kòrsou na altura di e buki akí ku sin duda algun ta un outobiografia, un historia real, ku te dia djawe  ta konta i un i tur por saka diferente lès afó. E ta un buki apto tambe pa nos studiantenan di skol avansá.

E buki ta kontené diferente potrèt (kortesia di Archivo Nashonal), informashon adishonal i imáhen di e époka ei.

BIDA DI UN SIPIR. Relato di susesonan di e último añanan di prizòn na Plasa Wilhelmina i e promé añanan di prizòn na Koraal Specht  ta un bunita buki ku no por falta den ningun kas. E ta kontené 277 página. Interesadonan por yama 668-8078 òf manda un mail na djisunpensamentu@gmail.com. Preis di e buki ta NAf 59,95. Pa mas informashon por subi tambe nos página di Facebook: Djis un Pensamentu.

​FOLLOW ME

  • Facebook Social Icon
  • YouTube Social  Icon