INOUGURASHON

DJIS UN PENSAMENTU, Tomo di Poesia i Website.

Djamars, 11 di mei 2010, ouditorio di Biblioteka Públiko Kòrsou tabata esenario di presentashon di Djis un Pensamentu. Kolekshon di poesia i prosa poétiko. Tomo I i www.djisunpensamentu.com.

Riba e atardi akí, Cathleen Giterson a presentá su promé tomo di poesia i na final di e anochi el a lansa su website ofisialmente. E buki Djis un Pensamentu ta un bunita buki kaminda por haña tantu téknikanan tradishonal komo modèrno; estilonan internashonal mashá famá i

mashá ekspresivo i awor skirbí na papiamentu.

E ta kontené 80 obra literario. 50 poema manera poesia líriko, ritmiko, épiko, soneto, refran, pantoum, kuatèrn, fábula, akróstiko, poesia di verso liber i poesia ku fasun (shape poetry) na koló. Tin tambe 10 supkapítulo di poesia kòrtiku: Haiku, Senryu, Naani, Aforismo, Limerick, Sedoka, Sèptolèt, Clerihew, Noneto i Cinquain. Tin 20 prosa poétiko di diferente largura. E buki ta ilustrá ku 25 potrèt den un bunita komposishon kolorido. I na final por haña un vokabulario ku nifikashon di tipo di poema ménos konosí i hopi palabra i ekspreshon profundo, edukativo i chistoso di ántes.

 

E website ta hiba komo lema: Un E-magazine pa inspirá, eduká, konsientisá i entretené.

Riba e atardi ei, MC Glenn Thomas a presentá Cathleen Giterson ku a habri e presentashon deklamando tres di su poesianan ku a kai mashá na agrado di e públiko presente. Seguidamente tres hóben respektivamente Terrence Locadia, Lionella Bonifacio i Pablo Bonifacio a deleitá e públiko ku algun poema mas. Kanto tabata na enkargo di Gerald-G, ku a presentá e bunita balada titulá Di bo so, di kua letra na papiamentu ta di Cathleen Giterson mes. Tambe públiko a sera konosí e anochi ei ku un personahe mashá pekuliar kende ta Djispi, ku nos por bisa ta e ‘host’ di e website. Djis un Pensamentu. Kolekshon di Poesia i Prosa Poétiko. Tomo I, ta kankan di tópiko profundo i pensativo, pero tambe liviano i chistoso pa entretené. E ta optenibel na tur bon libreria. E tin177 página i ta destiná pa tiner i adulto. Pa un preis di baka flaku (Naf 29,95) so so, bo mester tin e bunita buki bibu i modèrno akí den bo kolekshon. Pa mas informashon por subi www.djisunpensamentu.com.

​FOLLOW ME

  • Facebook Social Icon
  • YouTube Social  Icon